Rusiya ABŞ-la müsadirə edilmiş obyektlərin qaytarılmasına dair danışıqlara başlayıb
Rusiya və ABŞ nümayəndələri ABŞ ərazisində faktiki olaraq müsadirə edilmiş Rusiyanın altı diplomatik mülkiyyət obyektinə giriş əldə etmək barədə danışıqlara başlayıblar.
Bu barədə Rusiyanın Vaşinqtondakı səfiri Aleksandr Darçiyev TASS-a müsahibəsində bildirib.
Onun sözlərinə görə, artıq altı diplomatik daşınmaz əmlak obyektinin qaytarılması ilə bağlı danışıqlar prosesi başlayıb. A.Darçiyev bildirib ki, bu obyektlər faktiki olaraq 2016-2018-ci illərdə ABŞ hakimiyyəti tərəfindən müsadirə edilib.
Səfir əlavə edib ki, ABŞ tərəfinə Rusiya diplomatik missiyası nümayəndələrinin yoxlama keçirmək və dəymiş ziyanı qiymətləndirmək üçün bu obyektlərə girişinin təmin edilməsi tələbini əks etdirən "yol xəritəsi" təqdim edilib.
